MAGIS

Estudyante Ko Noon, Kaguro Ko Ngayon
Joy Isidro, Guro sa Gr. 7, Kagawaran ng Filipino

Posted Monday, 20 - Sept - 2004 10:37 AM

     Kaybilis lumipas ng panahon! Ang dati kong mga estudyante noon, mga kaguro ko na ngayon. Kunsabagay, ilan taon na nga ba ako sa Xavier? Matagal na rin naman!

     Nakakatuwang isipin na ang ilan sa mga estudyante ko noon ay kasa-kasama ko na sa Xavier. Marami-rami na rin sila. Isa sa mga ito si G. Allen Silvano, ang Campus Ministry at Service Coordinator ng Grade School. Estudyante ko siya nang siya ay nasa unang baitang pa lamang. Siya yaong batang tahimik at magalang. Gustong-gusto ko siyang tinatawag noon dahil bukod sa matalinong bata, matatas na matatas siya sa wikang Filipino. Pilipino pa nga yata ang tawag namin sa asignaturang ito noon. Isa na rin siya sa iilang mag-aaral ng batch na iyon na may apelyidong Pinoy.

     Pagkaraan ng ilang taon, nalaman kong nais pala niyang magturo sa Xavier. Nakakataba ng puso na malaman na ang dati mong mag-aaral noon ay nais maging guro. Nagpakitang-turo siya sa Filipino sa klase ko pa. Mas kinakailangan siya sa Math kaya naging guro siya ng Math sa loob ng ilan taon.

     Natutuwa ako at nagmamalaki sa tinamong tagumpay ni G. Silvano. Maaring walang pera sa pagtuturo subalit yayaman naman siya sa karanasan. Hindi lamang mga estudyante ang matututo sa kanya kundi marami rin siyang matututuhan mula sa kanyang mga ma-aaral. Alam kong malaki ang maibabahagi ni G. Silvano sa paghubog ng mga katulad niyang Xaverian.

     "Allen, salamat sa mga ipinakikita mong dedikasyon sa iyong trabaho bilang tagahubog ng kaisipan at katauhan ng mga tulad mong Xaverian. Pagningasin mo pa ang iyong pagiging Xaverian! Ipinagmamalaki kita. Hindi nasayang ang pagod ng iyong mga guro na kahit paano ay naging bahagi ng iyong buhay at tagumpay."

Go back to the top ^