“Hindi kailangang maging isang katangi-tanging tao upang makagawa ng mga katangi-tanging bagay.”

      Kilala ang buwan ng Agosto bilang buwan ng markahang pagsusulit, buwan ng tag-ulan at buwan ng Wikang Pambansa. Higit dito, ito rin ang buwan kung kailan ginugunita natin ang Mahal na Birheng Maria, ating Ina.

      Noong ika-23 ng Agosto, ipinagdiwang ng buong komunidad ng Mataas na Paaralan ang Kapistahan ng Pag-aakyat sa Langit kay Bireheng Maria na pinangunahan ni Fr. Johnny Go, S.J. at Fr. Guy Gibelondo, S.J.

      Alinsunod na rin sa pagdiriwang ng Buwan ng Wika, ginanap ang pagdiriwang ng banal na misa sa wikang Filipino.

      Bilang pakikiisa sa pagdiriwang na ito, inialay ng mga kinatawan ng bawat taon ang mga panalangin na sinulat ng mga mag-aaral. Kasabay ng pag-aakyat kay Maria sa langit, itinaas din ng bawat isa ang kani-kaniyang kahilingan at dalangin sa Poong Maykapal.

      Makahulugan at pamukaw-pansin ang naging homilya ni Fr. Go na patungkol sa pelikulang Exorcism of Emily Rose . Isinalaysay niya ang naging buhay ni Emily Rose at iniugnay ito sa buhay ni Maria. Tulad ni Emily Rose na isang karaniwang kolehiyala, isang karaniwang tao lamang din si Maria na itinakda ng Panginoon upang isakatuparan ang Kanyang kahilingan.

      Ayon nga kay Fr. Go, “You do not have to be an outstanding person to do outstanding things.”

      Sa kapistahang ito, inaanyayahan ang lahat na tupdin ang mga plano ng Panginoon nang buong puso at walang pag-aalinlangan. Kawangki nina Emily Rose at Maria, tayo, mga pangkaraniwang tao, ang siyang hinihirang ng Panginoon upang gumawa ng mga di-pangkaraniwang bagay.

      Nagwakas ang banal na misa sa wikang pasasalamat. Sa pamumuno ni Jonn Dy, SC President, sinundan ito ng pagbati at pag-awit para kay Fr. Go na nagdiwang ng kanyang kaarawan noong ika-21 ng Agosto.

Go back to the top ^