XAVERIAN'S CORNER

Pagbabalik sa Kasaysayan at Pagmumuni sa Pagkakakilanlan

Julian Yao (G7B)

Posted Friday, 09-Dec-2005 9:12 AM

      Noong Disyembre 1, 2005, ang buong baitang 7 ay dumalaw sa Intramuros upang mabisita ang mga tanyag na lugar na may relasyon sa aming dugo, at pagiging kabilang sa lahing Pilipino at Tsino. Ang unang lugar na dinalaw namin ay ang museo at simbahan ng San Agustin. Doon ay nakita ko pa rin ang impluwensya ng mga Tsino, gaanuman kamunti, sa mga leon na gawa sa bato sa bungaran ng simbahan. Sa loob naman ay nakita ko ang iba’t- ibang mga kahanga- hangang kagamitan ng aking relihiyon.

      Ang pangalawang lugar na pinuntahan naming ay ang Bahay Tsinoy, kung saan ang pangunahing pokus ay ang lahing pinagsanib na Pilipino at Tsino, kabilang din dito ang ilang mga eksibit tungkol sa ilang Tsinoy na may kahanga-hangang ginawa o may malaking impluwensya sa lipunan. Dito ko rin nakita ang paghihirap ng ninuno kong Tsino, lalo na sa panahon ng Kastila, ngunit nakita ko rin ang pagsisikap at unti-unting pagtaas ng ranggo nila sa lipunan. Dito ko natutunan na gaanuman kahirap ang buhay, maganda ang bunga ng pagsisikap at pagtitiyaga.

      Ang huling lugar na pinuntahan namin ay ang Fort Santiago . Ito ang lugar kung saan ikinulong si Jose Rizal ng mga Kastila bago pumunta sa huling hantungan niya, ang Luneta Park . Ito ay nagsilbi ding tambakan ng gamit at kulungan noong panahon ng Kastila. Dito ko naramdaman ang pagiging makabayan dahil sa mga nakita ko dito.

      Kahit na tatlong lugar ang pinuntahan namin, mayroon lang isang aral na nangingibabaw sa aking isipan. Hindi ko makakalimutan, o mababago ang aking pananampalataya, dugo, kultura at lahi. Dahil dito ay buong puso kong ipinagmamalaki ang pagkakakilanlan ko.

Go back to the top ^