HIGHLIGHTS

Play Production Workshop

para sa mga H4
Brian Ong (H4B), Tagapagbalitang Patnugot ng Stallion

Posted Wednesday, 23-Nov-2005 8:08 AM

      Isinabak ang mga mag-aaral ng ikaapat na taon sa isang Play Production Workshop na ibinigay ni G. Roli Inocencio ng pangkat panteatro – Ang Filipino Mobile Theatre – noong Miyerkules, Nobyembre 16, 2005.

      Tinalakay ng panauhing tagapagsalita ang kalakaran sa teatro, ang iba’t ibang bahagi ng entablado at kung anu-ano ang kabilang sa stage production ng isang dula.

      Nagbigay rin siya ng ilang mga ensayo sa pag-arte at mga payo kung paano mas mapagaganda ang mga dula ng bawat pangkat.

      Itinanghal naman ng Ang Filipino Mobile Theatre ang dulang Hiblang Abo na isinulat ng batikang manunulat na si Rene O. Villanueva.

      Ilan sa mga kilalang aktor na gumanap sa dula ay sina Lou Veloso, Sherry Lara, Bodjie Pascua at Archie Adamos na isa palang Xaverian.

      Nagkaroon din ng pagkakataong makapagtanong sa isang open forum ang mga mag-aaral pagkatapos ng pagtatanghal.

      Inihanda ng mga kagawarang Filipino at Ingles ang naturang workshop at ang pag-iimbita sa pangkat panteatro upang matulungan ang mga senior sa pagbuo ng kani-kanilang mga isang yugtong dula sa dalawang asignaturang nabanggit.

      Pinamumunuan ng kilalang aktor sa entablado at sa sine na si G. Ronnie Lazaro ang nasabing pangkat.

Go back to the top ^