Isa si G. Conrado Pasilan sa mga nakatalaga bilang security guard sa ating paaralan, at isa siya sa mga pinarangalang indibiduwal noong Setyembre 27, 2005 bilang pagkilala sa kanyang katangi-tanging katapatan.

      Noong Agosto, habang nag-iikot sa High School Building, napansin ni G. Paislan ang isang itim na envelope sa may tennis court . Kinuha niya ito at agad na dinala sa kanilang himpilan upang itala ito kasama ng mga nilalaman nito. Noon niya nadiskubre na may malaking halaga palang laman ang kanyang napulot kung kaya’t dagli siyang tumawag ng isang kasamahan upang i-surrender ang nasabing envelope sa mga kinauukulan.

      Sa isang maikling panayam, sinabi ni G. Pasilan na hindi kakayanin ng konsensya niya ang kumuha ng hindi sa kanya. Dagdag pa niya, “Kung kukunin ko ’yun, hindi ako makababalik dito para magtrabaho. Hindi ako makakatingin sa mga tao dahil alam ng konsensya ko ang ginawa ko.”

      Bilang mensahe niya sa ating mga mag-aaral, nais niyang ipaalala ang kahalagahan ng pagsasauli ng mga bagay na hindi sa kanila.

      Hindi man sukat akalain ni G. Pasilan na mabibigyang pansin ng Mataas na Paaralan ang kanyang ginawa, ipinagmamalaki siya ng buong pamayanang Xavier, kasama ng kanyang asawa at ng kanyang anak.

Go back to the top ^